Bummel 2022

Bi friehligshafte Temperature hänn mir dis Joor unsere Bummel ussnahmswyys am 3. Bummelsunntig zelebriert – ganz traditionell in dr Innerstadt und im Glaibasel. Crrrrrrrrreeme!

Fasnacht 2019

Aadie Basel – mir sehn schwarz! Unser Sujet het wort-wörtlich ins Schwarze troffe. Dr Mäntigobe isch ganz im Zeiche vom Intrigiere gstande. Danke an dere Stell am TeleBasel! Zum Bricht vu TeleBasel. Dr Zyschtig het denn wie allewyl unserne Binggis ghört. Wie immer in de letschte Joore het sich dr Petrus am Zyschtig vo sinere beschti Sitte zeigt. Dr traditionell Abschluss am Mittwuch vorem Kunschtmuseum hänn mr denn wie jedes Joor mit de Schänzli-Fäger verbringe dörfe. Bilder drzue findsch in dr Gallery.

Creme Wiesn Vol. 6

Am 17. Novämber 2018 ist es wieder sowit gsi: die 6. Usgoob vom kultigschte Oktoberfest in der Region Nordwestschwiz het im prallgfüllte Mittenza-Saal in Muttenz stattgfunde.

800 Dirndl und Läderhose hänn zu de Lieder vom Trio Wolkebruch dr Saal zum bebe brocht. Impressione findsch in dr Gallery unter Creme Wiesn.

Safe-the-date! Am 16.11.2019 findet d Creme Wiesn Vol. 7 statt. Reservier dir di Stehplatzticket unter creme-wiesn@bluewin.ch

Fasnacht 2018 – Dr Deyfel isch looos

Mir luege uffe kalti, aber wunderschöni Fasnacht zrugg.

Mit viel Rauch, Lärm und Schprüch hänn mir 3 Daag lang blagiert, geschtikuliert und intrigiert.

Aagfange am Mäntignomidag miteme Gönner-Stopp in dr Steine bis zum Intrigiere am Mittwuchobe im Leuezorn wird d Usgoob 2018 unvergässlich bliyybe.

Fasnacht 2017

Dr Joorgang 2017 isch nid umme e Spitze-, sondern auch spezielle Joorgang gsi.

S 1. Mol in dr Gschicht vo de Creme Waggis hänn mir d Fasnacht mitere Gugge dörfe erläbe.

Au wenns dr Petrus am Mäntig nid so guet gmeint het, hänn mir 3 RIESE Dääg mit de Schotte dörfe verbringe!

Es isch e unvergässlichi und eimooligi Sach gsi. Härzliche Dangg an dere Stelle allne Schotte für die unvergässlichi Fasnacht! (c) Photo by Marc Gilgen

Soggeliplausch 2017

Dr Soggeliplausch 2017 het bi unserem Clique-Fründ Raphi Wyniger im Teufelhof ahgfange. Nochere Yfüehrig in d Bier-Wält isch es denn ab uffs Land gange. Mit Ross und Kutsche sin mr denn traditionellerwyys ins Elsass disloziert. Nocheme feine Ässe hänn mr wie immer no e Abstächer in d Blueme gmacht, bevors Richtig Stadt gange isch. Me mungglet, dass s Liecht vo Gwüssne wieder erscht sehr spoot glöscht worde isch…

Soggeliplausch 2017 – es fäähle dr Flip-Flop und dr VI-EI-PI

Creme Wiesn Vol. 4

800 Dirndl und Lederhosen hänn am 19. Novämber dr Mittenza-Saal in Muttenz wieder zum bebe brocht.
Yglütet het dr Obe dr David Bröckelmann, bevor d Kult-Band Trio Wolkenbruch d Stimmig zum Siedepunggt brocht het.
E kleini Uswahl vo de Bilder vo däm legendäre Obe findsch in unsere Gallery

Bummel 2016 – dr Abschluss vom Jubeljoor

Dr diesjöhrigi Bummel isch noch Freiburg gange. Inere Team-Challenge isch s Ziel gsi, welles Team am schnällschte dr Usgang findet. Noch güetiger Mithilf vo divärse Komponänte hänns schlussändlich beidi Gruppe gschafft…

Nachdäm mir uns im Adler in Schlienge verköschtigt hänn, sin mr Richtig Stadt disloziert. Wie allewyyl hänn mr in dr Freie no ein gno und de letschte Fasnachtstön zueglost. Gwüssi, so munklet me, hänn erscht seehr spoot s Liecht glöscht…Jamas Hellas!

Jubiläumsfasnacht 2016 – mir diniere

D Jubiläumsfasnacht 2016 isch e Top-Joorgang gsi! Unser Clique-Papparazzi Marc Gilgen het uns während dr Fasnacht begleitet. In dr Rubrik «Fötteli» findsch die beschte Bilder. Viel Spass bim Stöbere…!